Kurumbi wone Pasal 2

Pasal 2

Eyo wuli anggup larikit nduk eeke menggerak wakagak yoragagerak wone

(Matiyut 24:32-35)

Matiyut 24:1-3 pekkaawok. Yetut oone waganggwi mendek inom nen Ala awi wurik abu abe kigirikwe me, “wi,” yinuk, yogwe iinok,  at Yetut nen it yorage logonet, “O yayi wurik wonage abok aret kinigen kogwe ilik lek a? Yugum ambi oba lu’luk aago logorak lek o. Abu tigitogon langgunogo nappugun o, yinuk, abet aret yokkiragi o,” yoragagerak.  (Mat 24:2)

Ti’nuk, (ayat 3) peebi puut Taitun paga logonet, at oone waganggwi nen at yogwi, “Togop arigin o, yo’niragandak nogo, mandenom arigin o? Ndi, kat woroorak inom, o age yobok ariyak inom, panggoni wage kenok, nineenu ariyak mendek NANO EEKE KAAGUN ? Yo’niret o.” Yoreegwaarak me, wone onggo yoragagerak nogo ti, (ayat 32-35 paga wonage me, ti aret liippogo logomunggup o.

“Madenom arigin? Ndi, “...nano eeke kaagun? Yoreegwaarak nogo ti, wone onggo eegu larogo yorage logonet, “Eyo Wuli anggup larikit nduk eeke menggerak nogo,” wakkagak yoragagerak me, yoragagerak nogo liippuwok o. 

Mat 24:32 “Eyo Wuli” 32 Yorage nagagerik, ambi yorage logonet, “Eyo wuli anggup larikit nduk eeke menggerak nogo kiniki wakkaanip o. Eno’mbak paga agarip wungge nagaatik, anggup lake kenok, O kiniyak muk panggo yegerak kagi o, yogo monggotak nogo pogom,

33 Togop eerigin o, yinuk, yokkiragarak yi, eeke kinigen kogo logomonggotik, E! Koorok panggo yegerak me, wage aret kogo o, yinuk, mbarumunggup o.onggo yoragagerak ti aret.

Togop me, o yogondak yi o-ndi o nggween paga wonage yi, nonggop eerit nogwe paga age yobok panggoni wage kogwe nogo eyo Wuli anggup lake pogom liippogo logowok-o.

1.    Anggup ambi lake kwak kogwe nogo yi:

Ala nen, “nggween wokkirigin o,” o maan togon Abarakam yoreegerak nogo (Wak 15:18) tahun 1948 tut Mei paga a’me aret agagerak.

At apuri Iterali mendek nogo nen, ko’lu-ki’me Ala wone yoragagerak nogo mbo punuk, it aakumi Negara-negara alik mendek Inagugi eerit nogo nogogwaarak nogo mamunggologo nogogwaarik, eerit nugwi iinok,  Ala nen Maluk onggo yi aakumi ndi aakumi o Kanan inaagan wonogwe nogo inenggela’me nugu logowak nduk mapiyaareegerak. (Yeremiya 9:13-16, Oteya 9:17 inom, Yetaya 12:15 inom, pekkoorak.)

Mappiige mbareegi,  aakumi alik mendek nen it Iterali inanggween tebenggola unggowe, aakumi Iterali ineebi lombok nen inoorit nugwi, eerit nogo nogogwaarak kwe, ndi, o yogondak awo eekwi kwe, inanggween wonogwe me,  iname noorak nduk eeko aagarik o.

Aakumi alik en it Iterali mendek inanggween paga nugwi kwe, ndi, it Iterali mendek apit wiganeegwaarak kwe, inanggween paga wonogolik mak eerak nugu logonet, “Ninanggween lek o,” yinuk, le yogwe eeko nogogwaarak kwe, (Wak.17:7-8) Ala nen “....Ala nen mondok-mondok inanggween wogoroorak,” yoragagerak nogo tahun 1948 a’me agagerak. Ratusan tahun iname wonogolik, aakumi inanggween paga nugu nogogwaarak nogo yogondak it inanggwen wonage me, Iname o Kanan  nogome  nogo agarik-o. Ti anggup ambi lake kwak me, o age wobok ari nage logonet aret age mbako ogoorik o.

2.    Anggup ambi lake kwak kogwe nogo yi:

Yi aakumi-ndi aakumi ( Bangsa-bangsa lain) nen alom lek kagak, it Iterali mendek ineebi lombok mbako agaarik o.  O yogondak aret! Ala nen, “O age yobok ari wage kagak, togop eerugun o,” yoragagerak nogo aret eeko agarik o.

( Pelareegerak 4:27. Inom, Yetekiyen 12:15  inom,  Oteya 9:17 inom,  yoragagerak nogo aret mak aago nugu agarik-o.

Ayat eebe abu’me mbanggirak yi pekkaanip o.

Pelareegerak 4:27. At Aliku ALA nen aakumi inanebunu alik mendek inenggela’me logomunggup nduk, mak eerogo pinagamenggerak inenggela’me wonogo logonet, it ando kambit nogwe iigak, kit ando mbereeluk mban kineenik aret logomunggup o.  

Yetekiyen 12:15 inom, Yi aakumi ndi aakumi inenggela’me nappiige, yi awi ndi awi abok aret mappiige, eeke neenok, Naliku ALA an aret ineenu arugun o.

Oteya 9:17 inom,  Ndi, kit nogo ti, Ala wone konembunuk liirogon eekwi lek me, Nogoba Ala nen kit mbo pinagamenggerak yi aakumi ndi aakumi inenggela’me yagak-ndagak nugu logomunggup nduk, Mak eerogo pinagagin o, yinuk, yokkiragi o,” yoragagirak.   

Ala wone abut nggaruk togon yoraagagerak nogo mbo pogo mbareegwa, onggo aakumi inanebenu alik mendek inenggela’me nugwi me, Iterali ineebi mbakwi, inoorit nugwi,  eekwi iigak, Ratusan tahun eereegerak.

O yogondak Presiden Iran nen ari logonet,  “ Iterali inetenggen pegiyoorak neebi o. Inanggween lek eerogo piigo logonet, inanggween nit aret tebenggologo logowoko,” ari agarik o. “Lirubu kwak sapu dari peta dunia, yereegerak. “Togop eerugun o,” yinuk, Ala nen yereegerak nogo aret eeko agaarik o. Ti anggup ambi lake kwak me, kogo ogoorik o.

3.    Anggup ambi lake kwak kogwe nogo yi o:

Ala nen “Ne ambi paga kuwak eerogo piyaagin o,” wone wonage me, eeke agarik. Yeremiya 16:14-16, Yetekiyen 11:11-12, 16-17. Ti wone ambi mondok iya me, o yogondak ti aret kuwak eeppiige agarik o.

Mbuku pasl ayat ninogoba mbanogo pinaggerak ti, Ayat eebe mbanggirak abeenok  yi aret me, malenuwok o.

Yeremiya 16: 14-16 Aliku ALA nen ari logonet,“Inombomini nggween wogoragagim nogome aa’nduk unde eekkologogwa kwak unde eekkolaawak nduk, iniyokan piya woraagin me, aakumi nen, It Iterali mendek o Metit nen wumbiya wa’nuk wogoren wagagerak eenik menggerak Aliku ALA endage kumbunuk, kumbuk mbanggo o, yinuk, ambinom yugun lek o. Ata, It Iterali mendek o omarip paga pa’nggwe nen wogoren wage, yi o ndi o mappiyareegerak wonogwe me nen wogoren wage, eereegerak mondok eenik menggerak Aliku ALA endage kumbunuk, kumbuk mbanggo o, yinuk, yogo logorak eyom panggoni woraagin,” yegerak o.

16 At Aliku Ala nen ari logonet, “It aap yikwe wagangga ambik woraawak nduk yonggo piyaminggirak wogo logomenggaarik, it aap ti, piginabit nogo logogun o. Ti’nuk, towe warit nega ambik woraawak nduk, yonggo piyaminggirak wogo logomenggaarik, it aap ti, puut-puut tiyarogon

wonogwe, puut-puut teberogon wonogwe, yugum ambe nggaganak me wonogwe, eerak wonogwe iinok, inooko logogun o.

Yetekiyen 11:11-12, 16-17)

11 O kota yi ti, kuwali kwak, ndi, ineebe ti, enggaanggum kwak me, Nit obeelom logogun, mbakwi nogo mbarugwaarik o. It Iterali inanggween lombok paga  maluk onggo aaninggin lombok inoba kwippiyaagin ti paga

12 Naliku ALA an aret ineenu arugun o. An nen wone lengganogo yorage nogo mugurok nogwe, ndi, eeko logorak noone yugu nogo porogo wonogwe, eeka’lek yi aakumi ndi aakumi inaagan-ambokan wonogwe eeko menggaarak nogo mugurok nogwe me nduk, eeppiyoorak o,” yinuk, yo’nege kagagirak.

16 Aliku Itok Menggerak ALA nen wone yegerak nogo yi o, yinuk, yoroorak yo’nege kagagirak nogo yi aret. An nen yi aakumi ndi aakumi o nda time wonogwe inenggela’me

nappiige, yi awi ndi awi mak eerogo piige, eereegirak kwe, nappiyareegim nogome laalu wonogwe iigak, nalut eeko menggam nawi wurik kwak ti, an neebe aret o.

17 Neebe aret me, Aliku Itok Menggerak ALA nen wone yegerak nogo yi o, yinuk, yoroorak nogo yi aret o. An nen yi aakumi ndi aakumi wonogwe me nen ambit me lambunogo piige, mak eerogo piyareegim yi awi ndi awi wonogwe me nen kuwak eerogo piige, eeke logominggirik, wogoren inanggween lombok o Iterali unde logowak nduk piya woraagin o.

Yeremiya 32:37-38)

37 Nanini lombok mbake, nanini kani kunik negen wunuk togon wungge, eeke logonet, napuri yi o ndi o mak eerogo nappiyaminggirak logowam time nen, abok aret kuwak eerogo piinok, iniyokan o yime piya wage neenok, it nen o yime iniki ugun tayenak aret logogun o.
38 It an napuri aret ogwe, ndi, an nen it inogoba aret age, eerugun o.

Ngget iluk Tut Nopember tahun 2015  yi paga Presiden Netan Yahu nen mi’nanuk,  Napuri Iterali mendek Yiwi ndi wi mak eerak nugwi nogo, kinanggween yime wonage me, woranip o. Woraanip o. Yinuk, Radio paga, TV paga, Berita Dunia paga yoragagerak. An Kobo nen TV paga iname nawak nduk, wu kuwak eekwi iige minggirak.

“Maluk eeko nogogwaarak onggo aaninggin inoba piinok, mbo piyaagin lek o. Kuwak eeppiinok, iname inanggween paga logowak nduk, piya nagion o,”yinuk, Ala nen yoragagerak me, o yogondak aret eeko agarik o. Ti anggup ambi lake kwak me, kogo ogorik o. 

4.    Anggup ambi lake kwak kogwe nogo yi:

“Obeelom eeppiige logogin o,” Ala wone mbo pogo mbareegwa, “onggo mappiyaareegerak nogo, kuwak eeppiinok, obeelom eeppiiyagin o,” yoragagerak me, eeke agarik o. (Yetikiyen 36:24-30)  paga yereegerak mbanak wonage nogo yogondak eerikit nduk eeke me, wone Yetikiyen ti liippogo logonip o. Iterali mendek apit aret Yetut abet mbako agaarik o. Wone ambi (Yeremiya 16:14-16 pekogwe, ambi pasal 32:37-38 pekkogwe, ee’nip o. Ti anggup ambi lake kwak me, kogo ogoorik o.

ayat eebe muk mbanggirak wonage yi aret me, pekkaawok o.

Yeremiya 16:14-16 ti, abenok halaman 8-9 paga muk mbanirak ti aret.ndi, abu’me yi ti Yetikiyen mbanak.

Yetikiyen 36:24-30.

24 It yi aakumi ndi aakumi inenggela’me nen nggiginogo wumbiige, yi o ndi o nen kuwak eerogo piya wage, eeke logominggirik, it inanggween paga lombok logowak nduk, iniyokan piya nagin o.

25 Piya nanuk, inabin koorogo piige neenok, it obeelom aret logogun o. Inoba maluk lenggennage, inagugi ogut alut eerit nogo logonet maluk eerogo pakwi, eereegwaarak nogo, inabin koorogo piinok,
26 iniki ngget eerogo piige, iniki koonggwi nogo alik eerogo piige, eeke logonet, inogogumbuk iniki yugum pogom wonogwe nogo mbo punuk, iniki yanggonak logonet eeko menggaarak mendek eerogo piyaagin o.
27 An nen Naberiniki inikime mambiige, wone lengganogo yorage minggirak nogo mugurok nawak nduk, eeppiige, ndi, eeko logorak noone yugu nogo liippunuk eeko logowak nduk, eerogo piige, eerigin o.  
28 Eerogo piige neenok, nggween inombomini wogoragagim nogome ye mbambatinuk wonogwe iigak, an inogoba Ala aret age, ndi, it an napuri aret ogwe, eerugun o.
29 Maluk eerit nogo logonet, inoba maluk lenggenogo pateegwaarak nogo, lek aruwak nduk, inabin koorogo piige, ndi, mbi noogelo inoba kwippiyaagin lek gandum awi yaremenggaarak nogo mbilambunuk, anggen ambik yi’nage logowak nduk, eerogo pege, eerigin o.
30 Mbi noogelo nen mbaganit namenggaarak yi aakumi ndi aakumi inenggela’me wonogwe iinok, inenggali wappiigo nogogwaarak nogo, ambinom wappiigo logokwak, an nen yi eyo ndi eyo yarak inom, yi mendek ndi mendek ineyabume yarak inom, anggen ambik yi’naruwak nduk, eerogo pigin o.

5. Anggup ambi lake kwak kin kogwe nogo yi:

O Iterali ti nggween mbuuluk me, ndi, aakumi ambik me, ineenggi lek aret nugu nogogwaarak kwe, o yogondak Ala nen ineenggi warak eeppiige agarik o. (Yetikiyen 36:1-11 Liipugwi, Wak. 49:22-26 pekkogwe, Pelaareegerak 33:19 paga malenggwi, eeko logonip o.

Yetikiyen 36:1-11  eebe  mbanggirak yi o.

 1“Aakumi nen ndarak yi wae. Ndogop eeppinagarak o, yinuk, it Iterali wonogo menggam puut-puut yorage logot o. Yorage logonet, Iterali wonogo menggam puut-puut yi wae. Aliku ALA nen yegerak yi, kinaruk konenggo logonip o.

2 At Aliku Itok Menggerak ALA nen yegerak nogo yi aret. It inom wim mbanak nen puut-puut eekwi nogo abok mbanggo logonet, Puut-puut mondok itok tiyarogon menggerak nogo, nit muk unde eekkologogurak me, kayik a! yinuk, yogwe me,
   

3 it puut-puut ti, eeppiyoorak yorage logonet, Aliku Itok Menggerak ALA nen yegerak nogo yi aret. It Iterali inawim inaagan-ambokan wonogwe nogo nen it Iterali menggam puutpuut time yi oone lek ndi oone lek o wogo eerogo pugwi, yi aakumi ndi aakumi unde eekkolaawok nduk, tebenogo piya unggwagak eekwi iinok, aakumi abok aret nen inabok mbanggwi, meek eerogo piigwi, eeko nogogwaarak me,

4 it Iterali wonogo menggam puut-puut ti, Naliku Nitok Minggirak an ALA nen yorage yi, konenggo logowak o. Puut-puut nggorek inom, puut-puut teberogon inom, o nggelok-nggobok me niyo nage menggim inom, o kobappaga abok aret inom, o langgu-langgu aago yi oone lek ndi oone lek eerak wonage inom, o kugun punuk mbaganggwi, yi aakumi ndi aakumi ando inaaganambokan wonogwe nogo nen miyukmeya eerogo pugwi, eeko menggam o kota-kota inom, at Aliku Itok Menggerak ALA nen wone yoroorak yegerak nogo yi aret.

5 At Aliku Itok Menggerak ALA nen ari logonet, It an nanggween nogo ndinggologo nogogwaarik, unde eeppatinuk, inale’nggen mbakwi, inanini mbako logonet, meek eerogo pugwi, eeko logonet, yi mendek ndi mendek tigippit unggwogo nogogwaarak me, nanini kani kunik negen eeke logonet, Ndogop eekkinabigin o, yinuk, it Erom mendek inom, yi aakumi ndi aakumi ando abok aret inom, yoragagirak o.

6 Togop aret me, Iterali inanggween eeppiigo nogogwaarak nogo, kat nen puut-puut nggorek inom, puut-puut teberogon inom, o nggelok-nggobok me niyo nage menggim inom, o kobappaga abok aret inom, yorage logonet, At Aliku Itok Menggerak ALA nen yegerak nogo yi aret. It yi aakumi ndi aakumi nen Iterali maluk eeppiigo logonet, meek eerogo piigak eeko nogogwaarak me, an nanini kani kunik negen eeke logonet, wone ambi yoraagin,” yegerak o.

7 At Aliku Itok Menggerak ALA nen yegerak nogo yi aret o. “It yi aakumi ndi aakumi Iterali inaaganambokan wonogwe nogo it kunduk, maluk eeppiige neenok, aakumi nen, Yi eeppiige, kayik a! yinuk, abet aret yugun o, yinuk, kumbuk mbanggi,” yegerak me, yokkiragi o.

8 It togop aret eeppiyaagin kwe it Iterali wonogo menggam puut-puut ti perak, an napuri Iterali ti, logonuk lek aret iniyokan iname nagun me, it inake yi eyo ndi eyo agarip ndake, anggen yit nage, eeruwak nduk, puutpuut ti nen amburu eerogo wumbege logogin o.

9 Iterali wonogo menggam puut-puut ti paga niniki eya eerogo panege paga nale’nggen oba pege neenok, ineyabu ti paga eekkologwe, yi awi ndi awi yarit nogwe, eerugun o.

10 Puut-puut ti paga aakumi ambik eerogo piyaagin nogo ti, Iterali mendek abok aret wiganogo piige neenok, o kota-kota aakumi lek wuum agagerak nogo obaane’- me aakumi ambik aret ari unggwogwe, o langgu-langgu nagagim nogo obaane’me wukwi, eerugun o.

11 Puut-puut ti paga aakumi inom, inaanggumi inom, ambik aret wiganogo piige neenok, ndaganabit nogo logonet, ineebe ambik aret wigannarugun o. O aa’nduk puut-puut ti paga aakumi ambik ye mbambatinuk wonogogwa kwak eerogo piyaagin me, aa’nduk yi mendek ndi mendek yarak anggen ambik yi’nage nagagi kwak lek, yogondak ti abunuk, alik negen yi’nage logowak nduk, eerogo pigin o. Ti eeke neenok, it nen Naliku ALA an aret ineenu arugun o.

Wakkagagerak 49:22-26 eebe mbanggirak yi o.

 22 Kat Yutup ti, Eyo niyo eneerime wonage me, Eno’mbak ambik wigangge nagaatik,Yugum yagat wurik paga engga ndoonogo pege menggi kwak Aret logomunggun o.

 23 Aap yi nineebi o, yinuk, kooriyak nduk, Ineegin-inomaale li’luk ee’nuk wogwe, Inanini nen maale paga wondep wukkakwi, Eerumenggaarak kwe,

 24 At Omaawi Ambik Menggerak an Yakup Yeenggwa Nega nen yeenggwa kege, At Omaawi Ambik Yugum nu’- lek menggi kwak logonet, An Iterali Ndegennaka nen kat ndegenggake, Eeke menggerak me, Keenggi aaninggin ambik lek teeluk aret wonage, Keegin keenggime nu’lek porogo wonage, Eeke logomunggun o.

 25 An kogoba nogoba Ala nen yeenggwa kege, At Omaawi Lombok Menggerak nen ale’nggen koba pege, Eeke logonet, Agi mbogut paga nen wuppagi wage, Ogu nggween abu’na nen obeelom eerogo nippagi wage, Ndi, kakwe ndaganake menggim obeelom eerogo pege, Elak amburu ambik eerogo pege, eeremenggerak paga Kapuri obeelom aret ndarogo wokkege, Eeke logowak o. 

26 Puut mondok tiyanak itok menggerak inom, Puut lunik mondok taati menggerak paga Anggen abe yarak mban kologwe inom, Kat kombomini nogo ti, ti kwak logonet, Inale’nggen noba paneegwaarak mbuuluk negen kwe, An kogoba nen koba pagage ti, nggwok negen aret me, Koreewi inenggela’me nen kat mban tiyanak wonage keenok, It ninom lambuk togon ninale’nggen abu iya koba pagago o.

 Pelaareegerak 33:19  ayat eebe mbanggirak yi o.

19 It nogo nen aakumi inanebunu lombok yonggo piinok, Puut paga wogoren lagi nanuk, Wone yugu ndak-ndak yi mendek ndi mendek warogo kani kunggwi, Niyo nggwok yenggenak inikime yi mendek ndi mendek yagabit aago wonage nogo inom, Yi aa’nggi paga mbini enggela’me iniki kunik kumaarak wonage nogo inom, Waganogo nenggak mban eeko logogun me, Inale’nggen nen keyage wako logowak o,” yinuk, yoge,

 “O age wobok panggoni wage ndak-ndak, aakumi Iterali mendek ineeninggi warak arugun o,” yinuk, Liiru mbanak wonage me, a’me aret age woanage agarik o. Ambi Put-put paga, alu’me yi eyo ndi eyo agarip ndake, anggen yit nage eeruwak nduk, amburu eerogo wumbege, eeko logowak nduk,  yoragagerak me, o yogondak aret eerit nage agarik o. Wone ti iya me, liippogo logonip o.

Ambi Wak. 49:25 “Ogu nggween abu’na nen obeelom eerogo nippagi wage..”Ti nggween abu’na nano mendek wonage kenok, nippi woraagin?  Ti Minyak mondok iya negen kwaakogogwaarak me, Iterali inaminyak yi Negara ndi negara inagan-ambokan wonogwe nogo nen kuni wagak eekwi iinok, o Iterali mondok obeelom aakumi ineenggi warak kwak eerogo piigo agaarik o. Ti anggup ambi lake kwak kogorak nogo aret o.

6.    Anggup ambi awo laka’lek ti, 

Keretut ninom o oolo yime lambunugun nogo aret o. Iri’me tanda ambi kaagun nogo ti aret. Ti eeppinaniyak eyom panggoni wage kenok, o yime tanda nogo ti, (Mat. 24:4-28 (ayat 9-14 lippinip.) age wobok mbanak me, ndi, kogwe kenok ti, ayat 8, “it kumi elege ndaruwok nduk aa’nduk enegen paganak yagan wako mengga kwak, togop ndak-ndak aa’nduk kinoba aaninggin-paaninggin eeppinagage kaamunggup o. Yoragagerak me, o yime eerit nage ti, liippogo logowok o. Yogondak aninggin-paninggin ti mendek eekwi me, kwe nogo enegen paganak yagan wake kwak agarak o, mbako logowok o. Elege ndake kenok, tanggal ndi paga ndake, Jam ndi paga ndake, ninenggo’lek ti kwak, “Ndi eyom paga lambunugun nogo,” nineenggo’lek me, ninom, ninom lambuniyak eyom ari wage kagak, eeko logorak wone mbere yo’nirage nogo yi aret.

Ambi, 24:42 wonage ti, kinogoba an nogo, o ngge eyom paga woroorak kineenggo’lek me, kiniki tum wako logonip o,” Yo’nirage.

Ndi, ambi, 24:44 wonage ti, an aap aret nda’nagagirak yi, kit nen, Ne ndi eyom woroorak, mbaka’lek kiigak, woraagin aret me, kit mondok pipuk-papuk aago logonip o,” yinuk, yo’nirage eeke me, nit wone ambire ti imbirak ari wage kero, tum lik-lak aret wako logowok o.