Kurumbi wone Pasal 5

Pasal 5

Seribu tahun agekenok eeko logorak nogo yi o.

1.  Tuju tahun eeke nogo irip ari nage kenok, aninggin mondok alik negen it aakumi Iterali inoba piigwi iigak, (Mbuku Takariya pasal 12 inom, 13 inom, ti paga mbanak wonage nogo a’me aret eerigin me, liippugwi,

2.  Aninggin mendek inoba piigwi iinok, Iterali mendek nen inowe Mesias woraawak nduk leenggup maakwi, eyo karo-karo paga warogo pereegwaarak nogo iniki wakkologwe, eekwi iinok, Mesias Yetut nogo ninom woraagun me, wim nggwok Aromageron nogo eeppunuk, Wayu 20:1-3, ti paga mbanak wonage nogo eerigin o.

3.  Ninowe Mesias Yetut  ninom wogwe ninok, o nggween paga yime at ninowe endagembogut logonet, nit at awuri/apuri nogo abu’me logowok nduk,  pinanege, at apuri miirinabeegerak nogo inom iniki kunik aganake, eeke logonet, o nggween paga yime wim lek, abe mban nit abok ninale’nggen mban wonogwe, eerugun o. Ti seribu tahun paga eerugun nogo ti aret-o.

4.   At ninowe Yetut endagembogut logonet, wone lengganogo pinanege minggim o Yerutalem wonage me, o Yerutalem Ala awi mondok abe wuppunuk, aken time eeko nogogwaarak anti-Keritut lek eerogo pereegerak nogo obaane’me inale’nggen paga Ala inom, ninowe Yetut inom, imbirak inendage tiyaappogo logogun-o.

5.  Ninowe Yetut endage mbogut logonet, wim Aromageron eeppunuk, 1000 tahun eeke kenok, aa’nduk eerigin nogo ti, at Ibilit nogo mbutigele maappunuk mbuun ambena wuppemenggerak time kagak, 1000 tahun eerigin.

(Wayu 20:1-3) tuju tahun paga Aninggin-Paaninggin inoba piyoorak eyom nogo, nit abet mbareegurak nogo nit lek niigak kwe, it ando perak maluk mondok iya lombok inoba eeppiige kenok, abet mbarugun kenok  abok aret inoorugun. Ndi, it ando ti wim Aromageron eeko logonet, inoorugun. (Wayu 19:11-21) ti paga mbanak wonage nogo pekaawok.

6.  Wayu 20:4-6,  paga nen ari logonet, ti inooremenggaarak kwe, inowe endagembogut Yetut nogo nen mi’nanuk, 1000 tahun  eerikit nduk eeke kenok, aa’nduk abet mbaremenggaarak paga inooremenggaarak nogo ineenik agago mippiyaagin. Togop me, nit ninom ninowe endagembogut Yetut nogo it ninom aakumi wone lengganogo yorogo logogun o. Ambi eerigin nogo ti aret.

Ti mbuku 2 Timotiyut 2:12 paga ari logonet, (Maluk eeppinanugwi iigak, ninogogumbuk logonet, waganggwi niinok, at ninom tiyanak logonet, aakumi inarum logogun o. Nit nen at mbo pugwi niinok, at kunduk nit mbo pinanigin o.

7.  Ndi, at Ibilit nogo Mbutigele maarak Mbunambena maarak wonage kwe, aakumi inambokan lagangga at aret me, it abet mbareegwaarak inapuri ndaganakwi ando nogo inambokan lagangge logonet, inowe Yetut wone wappunuk, mugurok noorak, “Nineebi o,” At abu’me logorak nineebi o,” yugun me, 1000 tahun paga maluk eerugun kwe, Ninowe nino nen tebenogo pegak eeko logogun. 1000 tahun paga o nogo abe ninale’nggen paga wonogwe me, ( Yetaya 32:16-18;12:3-4,Yet, 11:7-9; yet 35:1-7) Ti paga mbanak wonage me pekkoogo logowok-o.

8.   Ndi, 1000 tahun irippaga ari nage kenok eeriyak ti, (Wayu 20:7) paga mbanak wonage koogorak. 1000 tahun irip paga ari nage kenok, Tile Kele piinogo pege kenok, Anini nen at apuri nen, At Ala inom, Yetut inom, ineebi mbakwi yi awi- ndi awi wonogwe nogo kuwak eeppiinok, Ala inom, Yetut inom, nit abet mbareegurak inom, it abet mbareegwaarak inom, mondok tebenogo pinanugwi, ninookwi, eeruwak nduk eekwi iinok, kani mbogut paga nen wunuk agan wage logonet, ineebe tigitogon nenet nagin ti, (Wayu 20:8-10) paga mbanak wonage me, liippogo logonet, ninagabiti mbako logowok o.

Ndi,  wone Agewobok paga eeriyak wone ti, ando apit Tuwan Telenggen awuri inom, Mbuku Wayu Ndaniyen imbirak  amburu liirogon mbanogo pereegwaarak wonage me, liirogon pekkoogo logonip o. Ti wim Aromageron eeppunuk, Keretut ninom o nggween paga yime abu abe eeppunuk, logonet, eeke koorak nogo liirogon mbanak wonage me,  pekkaanip o.

Abu’me yime Mbuku ( Yetaya 32:16-18;12:3-4,Yet, 11:7-9; Yet 35:1-7) agi’nggwe nomor 7 paga mbanggerak ti inom,  nomor 8 paga, Wayu 20:7, 8-10  ti nogo inom, eebe mbanogo mambigi-o.

1.  Yetaya 32:16-18. 16, Ti eeke kenok, karume nggween obeelom aruwam time nen a’me nggelok mban eekwi, Ndi, yabume yarak eyoongga kunik negen aruwam time obeelom mban eerit nugwi, Eeko logogun o.

17 Obeelom mban eerit namenggaarak anggen kwak ti, iniki ugun tayenak aret wonogwe, Aakumi obeelom mban eerit namenggaarak paga wone ambi inoba aga’lek iniki ugun kwi’ndak mondok-mondok aret wonogwe, Eeko logogun o.

18 Aakumi an napuri nogo yi wone ndi wone lek ugun lambunik wonogwe, Mugogo wumbiiga’lek iname menggam mondok time aret wonogwe, Alok-palok lek ugun ale’nggen paga wonogwe, Eeko logogun.

2.  Yetaya 12:3-4.

3 Aap niyo abu nen niyo miin toologo nengge kenok iniki yawe ari menggi kwak, At Ala kinagap ndaremenggerak paga kit togop aret kiniki ale’nggen alik negen eekkinake kaamunggup o.

4 Ne ti eyom paga kit nen it yorogo logonet, “Aliku ALA, Wa, yogwi, At endage kunogo kinoone nggwok paga yogwi, At eerit wagagerak nogo yi aakumi ndi aakumi inenggela’me yoranet nugwi, At endage tiyanak lombok menggerak nogo wiganogo pit nugwi, Eeko logonip o.

3.Yet, 11:7-9. 7 Tapi nggwiya yagat mbuk piyangga imbirak iri’ngga mbanogo nenet nugwi, Inaagalogwe imbirak inawi mbambunuk nogo yugwi, Tapi lembu nunggwaangga owak mbanogo nenet nugu menggakwak singa togop aret nenet nugwi, Eeko logogun o.

8 Elege awo elak nengge nen waalo muuru enoona nen wundi wage menggim taati yine kungge, Elege awo mbuuluk waalo aliirumbuk anggen punuk wonage me eenggi mambege, Eeko logogun o.

9 Niyo laut yenggenak nggween kaga’lek nobarogo pereegi kwak, At Aliku ALA eeke menggerak nogo it nggween paga wonogwe abok aret ineenu arugun  me, An nabuut abu alik leenak nogome At ambi nen at ambi maluk eeppegak eekwi, At ambi nen at ambi nibinogo pi nagak eekwi, Eeko logogun lek o.

4. Yet 35:1-7. 1 O  karume inom, nggween mbuk ka’let-ndi’nduk eerak inom, nen inale’nggen mbakwi, O karu ale’nggen nen anggen mbilanogo wumbege kenok, ambit-mbit warit nage, Eerugun o.

 2 O karume waambi anggen tuk mbilenggen eerit nage kenok, ale’nggen nen ndawi wake, keekok ari, eerigin o. O Libanon iri’ngga kwit agan lagit nage kenok, “Wi!” irogo mengga kwak, Puut Karemen inom, o Taron inom, iri’ngga-kale’ngga abe lombok menggi kwak, O karume togop aret eerogo pemenggerak paga at Aliku ALA abu tiyanak wonage, Ninogoba Ala abinak pindan-pindan eeke, Eeke nogo Aakumi inigen kaagun o.

3 Kineenggi ndeyak aago wonogwe, kinendop yilugu wonogwe, eerak wonogwe yi, kinomaawi eekkologo logonip o.

4 It iniki waanggo mban-mban wonogwe nogo yorage logonet, “It nen aaninggin kinoba pinagagwi nogo, kinogoba Ala nen anini wuk togon onggo eeppiige logonet, Kinagap ndari woraagin me, Kinagabiti mbaka’lek kinogogumbuk logonip o,” yinuk, yorogo logomunggup o.

5 Ne ti eyom paga it aap inigen mbuk wonogwe nogo inigen kogwe, It inaruk logu nogo inaruk konenggwi, Eerugun o.

 6 Ne ti eyom paga it aap inendop maluk nogo, rusa ku’mbonggak nege menggi kwak, ku’mbonggak nugwi, Inoone yogolik iniki apit nogo inoone warak a’nuk, inale’nggen nen keekok yogwe, Eeko logogun o. Ne ti eyom paga o karume niyo eneeri nggwok aret kilanogo wumbit wage, Karume kwe, niyo nggwok nage,

7 Mbini aganggen wonage nogo niyo nen yenggenogo pege, Niyo yawengga’lek nggween mbuk aago wonage nogo niyo tuburubu lagit wage, Ndi, o aa’nduk mba’ngge inawi miippatinuk wonogogwam nogome piinde inom, mbereewak inom, lagangge, Eeke logogin o.

5. Wayu 20:7-10,

7-8 Ti kage nagarik, tahun seribu eeppunuk, yi aakumi ndi aakumi inanebunu lombok o Magok inom, o Nggok inom, irip-irip time abok aret kuwak eeppunuk, wim eeriyak inikime nggaganogo mambiinet nege logowak nduk, Tile keele maarak mbuun ambena wonage nogo piinogo nippi wage kagarak. Piinogo nippi wage mbaki, aakumi inikime nggaganogo manabit nage kenok, aakumi mbini-kale’ngga pogom togop aret kuwak eekwi iigirak.

9 Iige nagarik, o kobak nonggologo pereegim time aakumi mbini negen togop aret kuwak eeppunuk, it abet mbareegwaarak Ala apuri nogo inookwi, ndi, o kota Ala inikilom mbake menggim nogo lek eerogo pugwi, eeruwok nduk, oo’nggut panggeko mbaka, kani mbogut paga nen wunuk agan wambi wage logonet, aakumi nogo tigitogon nenet nage kagarak.

10 Ndi, at aakumi inambokan lagangga Tile nogo, pigogo kani omoonuk wunuk mban ari menggim at nggeewo anini warak aa’nduk lagi wagaarak inom, at ore peebi lagi wagaarak pilit wone agan nege nagaarak nogo inom, imbirak wonogwe me nogome mbo nappege mbaki, liingge-kiyoma kani eyak andi nen mondok-mondok yagan yobak-nggolak wakwi iigirak.