PELATAKAN BATU GEREJA GIDI ANUGERAH

PELATAKAN BATU 

https://www.facebook.com/permalink.php?story_fbid=633965500093322&id=633593330130539

KURUMBI WONE AA'NDUK PEKKOORAK WONE

O AGE WOBOK  PANGGONI  WAGE  KAGAK,  O 

NGGWEEN PAGA YIME  AGE  KOORAK  WONE.

______________________________________________

Nit GIDI nen o yime eerit nage nogo liipugwi, Ala wone 

liippugwi, eeko logonet, mbako monggoorak nogo yi o. 

AA'NDUK PEKKOORAK WONE

Nit kinogobaamuni kiya wogo nogogurik, Ala aput Yetut-Keretut eyo Karo-karo paga ninake kangge logonet, ninomaluk lek eerogo pinanege, at ninake kambegerak paga nit abet mbakwi niinok, niniki ngget ee’ninake, niniki ngget “lahir baru,” ee’ninake kenok, niniki at Yetut paga panggombunuk, at apuri o nggween paga logonet eerit nugwu logorak yo’nirage, eereegerak wone nogo abok aret mamunggirogogurak kwe, peebi at ninom logowok nduk, wo’ninabi woroorak Ala wone Liiru mbank paga wonage nogo mbuluk kobak eekinake yelok kiyaareegirak me, “Yetut wo’ninabi woroorak wone inom, o nggween paga yime yogondak eerit nage wone nogo inom, liippuwak nduk mbininogo yora,”yinuk, mbareegirak. Mbke nagagirik, Gembala-gembala inom, Majelis-majelis inom, o Ilu wonogwe nogo Kuwak eeppiinok, “Liiru ndegen-ndegen mbanogo wa’niret-o,” yo’nogo mbakop, eekirak yi aret me, liippogo logonip-o.

 Wone yi Mbuku Ndaniyen inom, Wayu inom, ti mondok iya mban mbanak wonage kwe, ti mban mbanak wonage lek o. Ata, Mbuku Yeremiya inom, Yetaya inom, Yetikiyen inom, Matiyut inom, 1 Tetalonika inom, 2 Tetatlonika imbirak inom,  apit wonage me,  lambuk togon yorage mbareegi, “Iya!” yinuk, yorage neegak, inambe piyak ari, inoone mondok lek age, eekwi iigirak me, kit togon liippogo logomunggup nduk, Liiru mbanak yi aret me, pekkogo logomunggup o. Yoragagirak nogo, “Togop nogo lek o,” yogwe iyo, Ala wone liiru mbanak pasal inom, Ayat inom, nogo paga panggombunuk, yoragagirak me, “Ti abet aret o,” yinuk, mbako logowok o.

Kurumbi wone Pasal 5

Pasal 5

Seribu tahun agekenok eeko logorak nogo yi o.

1.  Tuju tahun eeke nogo irip ari nage kenok, aninggin mondok alik negen it aakumi Iterali inoba piigwi iigak, (Mbuku Takariya pasal 12 inom, 13 inom, ti paga mbanak wonage nogo a’me aret eerigin me, liippugwi,

2.  Aninggin mendek inoba piigwi iinok, Iterali mendek nen inowe Mesias woraawak nduk leenggup maakwi, eyo karo-karo paga warogo pereegwaarak nogo iniki wakkologwe, eekwi iinok, Mesias Yetut nogo ninom woraagun me, wim nggwok Aromageron nogo eeppunuk, Wayu 20:1-3, ti paga mbanak wonage nogo eerigin o.

3.  Ninowe Mesias Yetut  ninom wogwe ninok, o nggween paga yime at ninowe endagembogut logonet, nit at awuri/apuri nogo abu’me logowok nduk,  pinanege, at apuri miirinabeegerak nogo inom iniki kunik aganake, eeke logonet, o nggween paga yime wim lek, abe mban nit abok ninale’nggen mban wonogwe, eerugun o. Ti seribu tahun paga eerugun nogo ti aret-o.

4.   At ninowe Yetut endagembogut logonet, wone lengganogo pinanege minggim o Yerutalem wonage me, o Yerutalem Ala awi mondok abe wuppunuk, aken time eeko nogogwaarak anti-Keritut lek eerogo pereegerak nogo obaane’me inale’nggen paga Ala inom, ninowe Yetut inom, imbirak inendage tiyaappogo logogun-o.

5.  Ninowe Yetut endage mbogut logonet, wim Aromageron eeppunuk, 1000 tahun eeke kenok, aa’nduk eerigin nogo ti, at Ibilit nogo mbutigele maappunuk mbuun ambena wuppemenggerak time kagak, 1000 tahun eerigin.

(Wayu 20:1-3) tuju tahun paga Aninggin-Paaninggin inoba piyoorak eyom nogo, nit abet mbareegurak nogo nit lek niigak kwe, it ando perak maluk mondok iya lombok inoba eeppiige kenok, abet mbarugun kenok  abok aret inoorugun. Ndi, it ando ti wim Aromageron eeko logonet, inoorugun. (Wayu 19:11-21) ti paga mbanak wonage nogo pekaawok.

6.  Wayu 20:4-6,  paga nen ari logonet, ti inooremenggaarak kwe, inowe endagembogut Yetut nogo nen mi’nanuk, 1000 tahun  eerikit nduk eeke kenok, aa’nduk abet mbaremenggaarak paga inooremenggaarak nogo ineenik agago mippiyaagin. Togop me, nit ninom ninowe endagembogut Yetut nogo it ninom aakumi wone lengganogo yorogo logogun o. Ambi eerigin nogo ti aret.

Ti mbuku 2 Timotiyut 2:12 paga ari logonet, (Maluk eeppinanugwi iigak, ninogogumbuk logonet, waganggwi niinok, at ninom tiyanak logonet, aakumi inarum logogun o. Nit nen at mbo pugwi niinok, at kunduk nit mbo pinanigin o.

7.  Ndi, at Ibilit nogo Mbutigele maarak Mbunambena maarak wonage kwe, aakumi inambokan lagangga at aret me, it abet mbareegwaarak inapuri ndaganakwi ando nogo inambokan lagangge logonet, inowe Yetut wone wappunuk, mugurok noorak, “Nineebi o,” At abu’me logorak nineebi o,” yugun me, 1000 tahun paga maluk eerugun kwe, Ninowe nino nen tebenogo pegak eeko logogun. 1000 tahun paga o nogo abe ninale’nggen paga wonogwe me, ( Yetaya 32:16-18;12:3-4,Yet, 11:7-9; yet 35:1-7) Ti paga mbanak wonage me pekkoogo logowok-o.

8.   Ndi, 1000 tahun irippaga ari nage kenok eeriyak ti, (Wayu 20:7) paga mbanak wonage koogorak. 1000 tahun irip paga ari nage kenok, Tile Kele piinogo pege kenok, Anini nen at apuri nen, At Ala inom, Yetut inom, ineebi mbakwi yi awi- ndi awi wonogwe nogo kuwak eeppiinok, Ala inom, Yetut inom, nit abet mbareegurak inom, it abet mbareegwaarak inom, mondok tebenogo pinanugwi, ninookwi, eeruwak nduk eekwi iinok, kani mbogut paga nen wunuk agan wage logonet, ineebe tigitogon nenet nagin ti, (Wayu 20:8-10) paga mbanak wonage me, liippogo logonet, ninagabiti mbako logowok o.

Ndi,  wone Agewobok paga eeriyak wone ti, ando apit Tuwan Telenggen awuri inom, Mbuku Wayu Ndaniyen imbirak  amburu liirogon mbanogo pereegwaarak wonage me, liirogon pekkoogo logonip o. Ti wim Aromageron eeppunuk, Keretut ninom o nggween paga yime abu abe eeppunuk, logonet, eeke koorak nogo liirogon mbanak wonage me,  pekkaanip o.

Abu’me yime Mbuku ( Yetaya 32:16-18;12:3-4,Yet, 11:7-9; Yet 35:1-7) agi’nggwe nomor 7 paga mbanggerak ti inom,  nomor 8 paga, Wayu 20:7, 8-10  ti nogo inom, eebe mbanogo mambigi-o.

1.  Yetaya 32:16-18. 16, Ti eeke kenok, karume nggween obeelom aruwam time nen a’me nggelok mban eekwi, Ndi, yabume yarak eyoongga kunik negen aruwam time obeelom mban eerit nugwi, Eeko logogun o.

17 Obeelom mban eerit namenggaarak anggen kwak ti, iniki ugun tayenak aret wonogwe, Aakumi obeelom mban eerit namenggaarak paga wone ambi inoba aga’lek iniki ugun kwi’ndak mondok-mondok aret wonogwe, Eeko logogun o.

18 Aakumi an napuri nogo yi wone ndi wone lek ugun lambunik wonogwe, Mugogo wumbiiga’lek iname menggam mondok time aret wonogwe, Alok-palok lek ugun ale’nggen paga wonogwe, Eeko logogun.

2.  Yetaya 12:3-4.

3 Aap niyo abu nen niyo miin toologo nengge kenok iniki yawe ari menggi kwak, At Ala kinagap ndaremenggerak paga kit togop aret kiniki ale’nggen alik negen eekkinake kaamunggup o.

4 Ne ti eyom paga kit nen it yorogo logonet, “Aliku ALA, Wa, yogwi, At endage kunogo kinoone nggwok paga yogwi, At eerit wagagerak nogo yi aakumi ndi aakumi inenggela’me yoranet nugwi, At endage tiyanak lombok menggerak nogo wiganogo pit nugwi, Eeko logonip o.

3.Yet, 11:7-9. 7 Tapi nggwiya yagat mbuk piyangga imbirak iri’ngga mbanogo nenet nugwi, Inaagalogwe imbirak inawi mbambunuk nogo yugwi, Tapi lembu nunggwaangga owak mbanogo nenet nugu menggakwak singa togop aret nenet nugwi, Eeko logogun o.

8 Elege awo elak nengge nen waalo muuru enoona nen wundi wage menggim taati yine kungge, Elege awo mbuuluk waalo aliirumbuk anggen punuk wonage me eenggi mambege, Eeko logogun o.

9 Niyo laut yenggenak nggween kaga’lek nobarogo pereegi kwak, At Aliku ALA eeke menggerak nogo it nggween paga wonogwe abok aret ineenu arugun  me, An nabuut abu alik leenak nogome At ambi nen at ambi maluk eeppegak eekwi, At ambi nen at ambi nibinogo pi nagak eekwi, Eeko logogun lek o.

4. Yet 35:1-7. 1 O  karume inom, nggween mbuk ka’let-ndi’nduk eerak inom, nen inale’nggen mbakwi, O karu ale’nggen nen anggen mbilanogo wumbege kenok, ambit-mbit warit nage, Eerugun o.

 2 O karume waambi anggen tuk mbilenggen eerit nage kenok, ale’nggen nen ndawi wake, keekok ari, eerigin o. O Libanon iri’ngga kwit agan lagit nage kenok, “Wi!” irogo mengga kwak, Puut Karemen inom, o Taron inom, iri’ngga-kale’ngga abe lombok menggi kwak, O karume togop aret eerogo pemenggerak paga at Aliku ALA abu tiyanak wonage, Ninogoba Ala abinak pindan-pindan eeke, Eeke nogo Aakumi inigen kaagun o.

3 Kineenggi ndeyak aago wonogwe, kinendop yilugu wonogwe, eerak wonogwe yi, kinomaawi eekkologo logonip o.

4 It iniki waanggo mban-mban wonogwe nogo yorage logonet, “It nen aaninggin kinoba pinagagwi nogo, kinogoba Ala nen anini wuk togon onggo eeppiige logonet, Kinagap ndari woraagin me, Kinagabiti mbaka’lek kinogogumbuk logonip o,” yinuk, yorogo logomunggup o.

5 Ne ti eyom paga it aap inigen mbuk wonogwe nogo inigen kogwe, It inaruk logu nogo inaruk konenggwi, Eerugun o.

 6 Ne ti eyom paga it aap inendop maluk nogo, rusa ku’mbonggak nege menggi kwak, ku’mbonggak nugwi, Inoone yogolik iniki apit nogo inoone warak a’nuk, inale’nggen nen keekok yogwe, Eeko logogun o. Ne ti eyom paga o karume niyo eneeri nggwok aret kilanogo wumbit wage, Karume kwe, niyo nggwok nage,

7 Mbini aganggen wonage nogo niyo nen yenggenogo pege, Niyo yawengga’lek nggween mbuk aago wonage nogo niyo tuburubu lagit wage, Ndi, o aa’nduk mba’ngge inawi miippatinuk wonogogwam nogome piinde inom, mbereewak inom, lagangge, Eeke logogin o.

5. Wayu 20:7-10,

7-8 Ti kage nagarik, tahun seribu eeppunuk, yi aakumi ndi aakumi inanebunu lombok o Magok inom, o Nggok inom, irip-irip time abok aret kuwak eeppunuk, wim eeriyak inikime nggaganogo mambiinet nege logowak nduk, Tile keele maarak mbuun ambena wonage nogo piinogo nippi wage kagarak. Piinogo nippi wage mbaki, aakumi inikime nggaganogo manabit nage kenok, aakumi mbini-kale’ngga pogom togop aret kuwak eekwi iigirak.

9 Iige nagarik, o kobak nonggologo pereegim time aakumi mbini negen togop aret kuwak eeppunuk, it abet mbareegwaarak Ala apuri nogo inookwi, ndi, o kota Ala inikilom mbake menggim nogo lek eerogo pugwi, eeruwok nduk, oo’nggut panggeko mbaka, kani mbogut paga nen wunuk agan wambi wage logonet, aakumi nogo tigitogon nenet nage kagarak.

10 Ndi, at aakumi inambokan lagangga Tile nogo, pigogo kani omoonuk wunuk mban ari menggim at nggeewo anini warak aa’nduk lagi wagaarak inom, at ore peebi lagi wagaarak pilit wone agan nege nagaarak nogo inom, imbirak wonogwe me nogome mbo nappege mbaki, liingge-kiyoma kani eyak andi nen mondok-mondok yagan yobak-nggolak wakwi iigirak.

Kurumbi wone pasal 4

Pasal 4.

7 Tahun pagaAninggin-paaninggin mondok Alik negen aganaburak eyom paga eeko logorak nogo yi aret.

1.    Aninggin-paaninggin inoba arigin eyom nogo ti, yi tahun-ndi tahun paga eeriyak ti lek. Ti abe 7 tahun paga mban inoba aganabigin kogoorak. Ti. Ndaniyen 9:26-27 inom, Wayu pasal 11 inom, abu kin paga mbanak wonage.

2.    O nggween paga yime Aninggin-paaninggin mondok alik negen inoba ari noorak eyom muk wagarak nineenu eekak ti, nit aap abet mbareegurak/mbaremenggaarak nineebe lek o oolo Ndugwi paga Keritut ninom lambunugun lagi nogwe niinok, “nogo eyom wagarak ti aret mbako logogun/nineenu arugun.

3.    Ne ambit  nggwik togon inoba arigin nogo ti lek mban. Ata, nit aap abet mbakwi nineebe lek niigwi, o nggween paga yime maluk nggwok wiganit nage logonet, maluk eeriyak lek mendek eerit nage, Mat 24:9-12, 21. Mbanak nogo age, eeke kenok, arigin.

4.    Togop eerigin me, maluk wiganit nage kagak, o nggween paga yime abu naalop-kaalop eerit nage, it aakumi nen Iterali mendek ieebe inoorit nugwi, eekwi iinok, it Iterali mendek nen, “nonggop eeruwi o? O yi niniki tayenak ale’nggen logowok nduk, mi’narigin o? Mbakwi iigak, (Mat 24:21); aap ambi inanggela’me nen mi’narigin. (Ndaniyen 9:26b). Ti mi’narigin nogo ti endage Pilit Keritut nogo aret mi’narigin.

5.    Pilit Keritut ti endage ambik. Ndi, At Pilit Keritut ti mi’nage kenok, eerigin wone Tuwan Telenggen awuri inom mbuku Ndaniyen wone amburu mbanak paga mbaneegwaarak halam 242-243 ti paga liirogon mbanak wonage me,  pekkaawok o. 

6.    At Pilit Keritut nogo 7 tahun ti paga mi’nanuk eerigin nogo yi aret. Ndaniyen 9:27 Pekaanip. Eebe yi. 27 At aap endagembogut nogo nen satu kali tujuh eeke kagak aakumi inom wone abuk nggaruk togon koonogo pemenggerak kwe, satu kali tujuh oolo eeke paga, Ala ake warogo wogogwi inom, ake pugwi inom, ti pogo logorak lek o, yinuk, yoraagin o. Ndi, at nogo nen ogut aago aakumi inagabiti nen inamineeri ne agan naga mendek ambi Ala awi wurik me time mippemenggerak wonage kagak age wobok at oba kwippuurak koonak nogo aret at oba kwi’narigin o,” yinuk, an yo’nereegerak. Mbuku Ndaniyen wone amburu mbanak halaman 235 sampai hal 243 eeriyak ti paga mbanak wonage me pekkaanip.

1. Oone amburu paga aakumi Iterali ineebi mbakwi inom, Iterali inom, paalo aago logowak nduk, inom wone abuk nggaruk togon mbanigin.
2. Tiga stengah tahun aa’nduk paga ti, inale’nggen paga abe mban logogun. 
3.  Tiga stengah tahun kweebi eeriyak ti paga, wone abuk nggaruk togon koonogo pugu nogo, lek eerogo punuk, aninggin mondok iya lombok Iterali inoba piige,
4.   Ti eeppiige logonet, Ala ake warogo pugwi nogo lek eerogo piige,  Ake piiwogwe nogo mage agago pege,
5. Ogut aago aakumi inagabiti nen inamineri ne agan naga  mendek ambi Ala awi wurik me mippege, eerigin.
6. Tiga stengah tahun kweebi eeriyak yi abu eeke kenok,  (Mbuku 2 Tetalonka 2:3-9) paga mbanak wonage nogo age, ndi, irip paga lombok ti, Ninowe endagembogut Mesias ( Yetut) ninom wambi wogo logomonggoorik, wim nggwok endage Aramageron nogo eerugun.  Wayu 16:16  paga mbanak wonage nogo pekkaanip. Eebe yi. Ndi, it kugi ogolem pogom nogo nen aap nggween paga inendagembogut abok aret o endage Iberani inoone paga Aramageron nogome aret kuwak eeppiya wogwe iigirak.

Aninggin-Paaninggin abu iya lombok tiga stengah tahun peebi paga eeriyak kagagerak nogo ti, Mbuku Wayu pasal 4 nen nok pasal 16 paga mbanak wonage me, pekkoorak-o.

Kurumbi wone pasal 3

Pasal 3.

Ndugwi paga nitKetetut ninom lambunggwi wone

Age wobok paga nit keretut ninom lambunggwi wone nogo ti, mbuluk ninikime nalop-kalop wonage me, amburu liirogon mbanigin o. Ala wone pekkogwe, o nggween paga yime arit nage, eeke maloppunuk, Yetut ninom ndugwi paga lambu-nugun wone nogo yi aret o.

1)   Ndugwi paga Keretut ninom lambunggwi nogo ti, peebi Yetut wo’ninabi woraagin wone nogo lek. Peebi Keretut ne ambi paga woraagin,” yogo monggoorak nogo ti lek mban. Ndugwi paga ninom lambunggwi nogo ti, Keretut o nggween paga yime iyok pii wambi woraagin lek kogo.

Ti 1 Tetalonika 4:13-17 paga wonage nogo liippinip. Togop me, endage, “ Keretut ninom Ndugwi paga lambunugun,” yogo monggoorak. Keretut kweebi woraagin yogo monggoorak nogo ti, iyok o nggween paga yime pi wambi woraagin. Ti at ninom o nggween paga yime woraanuk, “1000 tahun eerugun,” yogo monggoorak.

2)   O yogondak ti, o nggween wiganit noorak eyom aret me, (Nappiigak 1:8 inom, 1 Tetalonika 4:17 inom, liirogon pekkaanip.)  It Iterali mendek nen inowe Keretut i Karo-karo paga wappunuk, Injil wone Obeelom wone nogo woolik, mbo pogo mbareegwa, (Yaya 1:11-12),  At ame lombok aret wambi wagagerak kwe, it aap at owe-awot nogo nen at eebe wagangga’lek aret wonogogwaarak.

12  Eebe wagangga’lek aret wonogogwaarak kwe, it ando iniki at oba panggombunuk, abet mbako nogogwaarik, waganeegwaarak nogo yorage logonet, “Kit mondok-mondok Ala apuri aret logomunggup o,” yinuk, it abok at apuri aret aganabeegerak.

Ala nen, at apuri miirik Iterali mendek nogo aret kagak ambokan piinok, obani’me nit aakumi Yunani mendek at abu’me pinaninuk, liippinanege me, o yogondak Gereja wiganiyak eyom aret mbako ogorik o.

(Nappiigak 1:8) eebe mbanak yi o.

8 Kit nogo Aberiniki kinoba wambi wage logonet, at omaawi eeppinagage kenok, o Yerutalem inom, o Yureya abok inom, o Tamariya inom, yi awi ndi awi iripirip time abok aret inom, an eerit nege kinigen neego nogogutak wone nogo yoranet nugu logomunggup o,” yinuk, yoragagerak.

(1Tetalonika 4:17) eebe mbanak yi o.

17 Mippiige logomenggerik, ti’nuk, nit nineenik awo wonogwe nogo, it ninom ndugwi enggela’me oolo taati ninowe ninom lambunuwok nduk, wo’niren nagin o. Wo’niren nage kenok, ninowe ninom mondok-mondok aret logogun o.

3)   Urum pasal 11 mondok liippinip o. O yogondak ti, it aakumi Iterali mendek tayoppiinok, nit Yunani mendek obeelom Wone woorak nineyom ninanonggwaan wonage me, alom ti paga, it aakumi abok Obeelom wone ineenu aruwak nduk, eerit nogo ogoorik o. Ti, Ninenggareja endage Injili di Indonesia aret nduk yagi o. Ti kwe, nit ninanonggwaan lek age kenok ti, o oolo ndugwi paga lambunugun eyom paga me,  Ala nen at apuri miirik Iterali ambokan lalu piyaareegerak nogo obaane’me at ame piinok, Obeelom eeppiige logogin o.

 

1)   Hari Pendakota ti, it Yakuri mendek mban inake ti lek. Ti nit aakumi Yunani mendek ninom ninake me, Nap 2:5-11 pekkoorak. Ti’nuk, Peterut mi’nanuk ari logonet, “ndogop ee’ninake o,” yinuk, Nabi Yowen paga yoragagerak liiru mbanak nogo pekkogwe, eeruwok o. Aakumi inanebenu inendage mbanak ti, it Yakuri mendek  inendage mban lek. Ti Yakuri lek mendek, nit Yunani mendek ninom ninendage mbanak wonage o. Ti’nuk, Mbuku-mbuku Nappiigak Pawulut nen mbanogo wa’niragagerak: Korindut, Oroma, Nggalatiya, Kolote, ndi, mbuku ando alik nogo inom aret ti, it Jemaat-jemaat Yunani mendek liippuwak nduk, nappereegerak. Ti iya ee’nake. Perjanjian Lama ti, It Iterali inake mban negen. Ndi, Perjanjian Baru ti, nit aap Yunani mendek ninake mbanak negen ee’nake. 

2)   O oolo ndugwi paga lambunugun nogo ti, nit aap abet mbareegurak inom, mbaremenggaarak inom, ti mban ninom eerugun. Ti nit Jemaat-jemaat  abet mbareegurak nogo kenok mban eerugun me, lambunggwi niinok, o nggween paga yime arugun nogo ti, abu naalop-kaalop Mat psl 24 paga mbanak wonage nogo aret arigin me, pekkoorak.

a)    wone alik ka’let arigin.

b)   Inambo’mbot laganggwi. Inambokan laganggwi.

c)    It aakumi abet mbakwi nogo ineebi nen inokwi,

d)   Mbi nogelo age.

e)    Mi nggwok nuk ari, togop eerit nagin. Ti eekwi paga Yetut woragin lek. Awo aret. 

(Mat 24:6-8)

3)   Aberiniki ninom eerit nugwi paga, o yime maluk eekwi wigak yukwak, tebenogo pegak nit abet mbakwi nogo aret me, Ndugwi paga lagi nogwe niinok perak, o nggween paga yime Maluk mondok iya aret wiganigin o. Andi, o yogondak eeke agaarik.

4)   Maluk mondok iya eerugun/wiganugun. Aninggin-paninggin mondok Alik negen eeriyak Eyom arigin me, wone ti mendek yi aret. Nit abet mbakwi nogo Lek niinok,  At mondok Maluk lombok eeka nogo aakumi inenggela’me mi’narigin. ndi, mi’nage kenok, Gereja wiganiyak eyom nogo lek age kagak, Aninggin-paaninggin Mondok Alik negen Aganaburak eyom nogo aret arigin o.

                 

Ndaniyen 9:25-26. 25 Wone yokkege yi, kinikime mondok liippege, liirogon wagangge, eeke logot o. O Yerutalem obaane’me mondok wuriyak o, yinuk, wone lengganogo wumbemenggerak kuli nen nok, at Ala nen leenogo punuk amburu eeppereegerak aap endagembogut nogo woroorak eyom kuli ti, tujuh kali tujuh inom, enam puluh dua kali tujuh inom, eerigin o. Ti eerit nage kagak, o Yerutalem maluk aago wonage nogo obaane’me wuko logonet, tu koonogo yarit nogwe, yugum pak yengget-wangget wurogo pit nogwe, eerugun kwe, aaninggin inoba piigwi iigak eeko logogun o. 26 Ndi, enam puluh dua kali tujuh ti, abu aret eeke kenok, at leenogo punuk amburu eeppereegerak woramenggerak nogo maluk ambi eerulik kagak warogo pugun o. Ndi, aap endagembogut ambi woramenggerak ti, awuri wogo logonet, o kota inom, Ala alut eeko menggam inom, pup eerogo pugun o. O kota alik leenak age yobok eeppuurak nogo ti, yi wu’nuk wage logonet, yi mendek ndi mendek yigirik- noonom eerogo pit nage menggi kwak togop aret eerugun o. Wim eerit nogwe, yi mendek ndi mendek maluk eerogo pit noorak koonak nogo, eerogo pit nogwe, eekwi iigak, o irip yubuni nagin o.